要成為狗狗嘅大佬，有幾個實用技巧，今日同大家介紹「沉著、堅定嘅能量」。由於能量喺狗世界係好重要，主人一定要淸楚理解要散發出乜野能量，先至令到狗狗身心健康、快樂。呢種特質唔單止透過講話嘅方式傳達出黎，亦透過舉手投足嘅姿態傳達出。

狗仔應該有平靜、服從嘅能量，呢種係狗群中「追隨者」嘅自然狀態。當一隻狗體現出呢種平靜，服從嘅能量狀態時候，佢嘅姿勢係放鬆，耳朵會垂底，隨時準備回應你嘅指令。舉例，當主人第一次將狗帶返屋企，多數情況下，狗仔係第一次強烈地感受到人類情緒化嘅能量，主人急不及待咁錫佢、高音同狗講野，結果狗狗視主人係興奮、激動嘅能量，而唔係沉著堅定能量。好多狗都唔聽主人嘅說話，原因正如此，因為狗媽媽從來都唔會咁，呢種行為喺狗仔角度並不自然。

技巧練習－以狗嘅角度睇事情

你嘅每一種能量，唔理係好係壞，都直接反映你嘅身心狀態同心意。舉例，沉著堅定嘅能量一定係以自信嘅神態表現出黎，挺直嘅膊頭，從容嘅步伐。仲有一種來自淸楚自已當下要咩嘅淸晰。接住落黎嘅練習可以幫你認淸自已嘅能量狀態，以及你周圍嘅人或狗能量狀態，方法就係將注意力放喺兩種相對嘅狀態上：正面能量同負面能量。

認識正面能量－做呢項練習時，最好身邊有一伴同伴或一面鏡：

1）企係一位你可以信任嘅朋友面前，回想你曾經對人生感到非常積極正面嘅時光，想像自已正處於身心快活嘅一刻，將嗰股能量傳送到心中，用一至兩分鐘，讓自已回到嗰種心理狀態。

2）調整身體嘅姿勢配合心中積極正面狀態，注意雙臂、胸膛、膊頭同面部表情有咩變化，你嘅呼吸變成點。

3）請同伴如實反映佢觀察到嘅改變。能量係有感染力嘅，可以影響周圍嘅人或動物。喺你心中充滿正面思想嘅同時，請嗰位同伴示範你嘅肢體語言係點變化。

4）察覺能量係邁向改變能量嘅第一步，做完呢項練習之後，喺接住落黎嘅幾小時或幾日裡面，盡量複製你所創造出黎嘅呢種正面能量狀態。你傳遞畀狗狗嘅能量亦會起巨大轉變。

認識負面能量

1）想像自已處於情緒低落、憤怒或沮喪嘅時刻，用一到兩分鐘將自已沉浸喺嗰種消極負面嘅心理狀態。

2）調整身體嘅姿勢來配呢種心態，注意雙臂、胸膛、膊頭同面部表情有咩變化，你嘅呼吸變成點。

3）請同伴如實反映佢觀察到嘅改變。能量係有感染力嘅，可以影響周圍嘅人或動物。喺你心中充滿負面思想嘅同時，請嗰位同伴示範你嘅肢體語言係點變化。

4）深深呼一口氣，然後返去第一階段練習嘅正面心態，用一至兩分鐘，令自已回到嗰種開心、充滿力量同靈感嘅心理狀態。注意你係幾咁容易就改變自已嘅正面心態同負面心態。

你可以喺狗仔身邊重複呢啲練習，睇下佢有咩反應，尤其當你嘅能量狀態改變嘅時候，佢有咩表現。你都可以對住你嘅仔女或伴侶練習。一旦你能夠了解自已係點樣對別人產生直接嘅影響，你就會比較留意自已嘅能量，同埋佢會點影響你嘅狗狗同周圍嘅人。

參考：西薩。米蘭 狗班長的快樂狗指南